kahani pichlay Saal ki, meray dost

Kahani pichlay Saal ki :(

#2019

Janay yeh kaisa sitam hua

Kaisay hum sab pay zulm hua

1 Saal key din thay  guzar gaye

Lekin kuch manzar badal gaye

Kuch aisi hum say khata hui

 dost hi mujh say mukar gaye 😭

Mana key men masroof sa tha

Kuch sehat liye mashghool sa tha

Lekin yeh kub men jamid hua

Kuch apnon say men door sa tha? 

Aisa bhi nahi key chor diya

Phir bhi tum nay moon mor liya

Sab kaisay hanstay gatay thay

Sab jagah hi sath men jatay thay

Kub tum ko yeh mehsoos hua

Kub Dil apna yoon door hua

Mana key tum takleef men thay

Mana key hum nazdeek na thay

Kuch bht bari si batain theen

Kuch anjani si ratain theen

Aik khamoshi ka dor raha

Doori ka bht phir zor raha

Kuch un key gilay bhi jaiz hen

Kuch ab bhi fakhar say faiz hen

Lekin yeh Kehna theek nahi

Key hum ko koi tofeeq nahi

Hum aaj bhi Dil key saaf hi hen

Kerna khuda ka, key pass hi hen

Phir kyun sab say door rahain

Kyun apnon say moon mor rahain

Nahi aik khata key matlub yeh

Key saray sahih bhi door rahain

Phir kyun ab sab khamosh say hen

Kyun khud hi khud madhosh say hen

Mana key bhoolna mushkil hey

Lekin kya kuch namumkin hey? 

Chalo phir say ik aaghaz karain

Ik sath nayi parwaaz karain

Jahan koi purana zakhm na ho

Hum khul key Dil ki baat karain

Kya rakha hay naraazi men

Ik doojay ki barbadi men

Is Saal ki Jo shuru'aat karain

Aao sab phir say sath karain

Meray guzray din lota do mujhey

Ya phir fehrist say mita do mujhey

Yeh beech ka dukh na sehna hay

Hum ko to sath men rehna hay

Sab pichlay gham bhula do na

Meray dost wapas la do na

Us khata ko ab simta do na

Sab key dilon ko mila do na

Aaye na kabhi phir waqt kabhi

Tootay na kabhi phir rabt kabhi

Woh waqt key jub hum bikhar gaye

Meray dost yoon mujh say mukar gaye

-Aakif Hassan, 1st Jan 2020